Bienal de Pontevedra

En 2022, co estalido da guerra en Ucraína, Tizón viaxou ao país en varias ocasións para documentar o conflito e realizar labores humanitarios nas zonas máis afectadas. Durante a súa estancia, capturou as tres imaxes que agora se expoñen na Bienal de Pontevedra. Fe en tempos de guerra (2022) é un díptico que reflicte o contraste entre a espiritualidade e a violencia da guerra. A imaxe da esquerda mostra unha misa nunha igrexa de Lviv, onde soldados se reúnen antes de partir á fronte, mentres que a imaxe da dereita, tomada nunha estrada próxima á fronteira rusa, documenta a morte dun soldado ucraíno mozo. Esta fotografía lémbranos as consecuencias dun conflito que, moitas veces, é xustificado en nome de ideoloxías ou crenzas.