Bienal de Pontevedra

Isabel Rocamora reflexiona sobre o proceso de deshumanización que sofren os individuos dentro do ámbito militar, deconstruíndo as ideas tradicionais de heroísmo, sacrificio e masculinidade. A obra explora os sentimentos que se agochan detrás das estruturas militares ao centrarse en como o exército normaliza a violencia, a cal se afasta da súa dimensión heroica para volverse cotiá e banal. Situada nas paisaxes abatidas de Normandía (Segunda Guerra Mundial) e ancorada en testemuños dun militar británico e dun civil serbio que participaron respectivamente nas guerras de Iraq e dos Balcáns, Body of War ofrece unha reflexión poética sobre a evolución do ser humano cara á condición de soldado. A película descompón a furia da loita nunha coreografía de xestos ritualizados, un combate corpo a corpo no que os soldados, interpretados por excombatentes reais, executan movementos que, ao retardarse e repetirse, revelan tanto a relación íntima coma a desconexión entre a humanidade e a brutalidade inherentes á guerra. A violencia apréndese, interiorízase e convértese nun acto performativo. As imaxes dos soldados en acción acompáñanse da música de o Kanon Pokajanen de Arvo Pärt, cuxas pezas corais, baseadas nun himno da Igrexa ortodoxa rusa sobre o arrepentimento, reforzan a dimensión emocional e espiritual do encontro bélico. Lugar: Edificio Castelao