Bienal de Pontevedra

Francesc Torres aborda, co seu característico ton crítico, a crecente retórica da extrema dereita ligada á ideoloxía do anarcocapitalismo. Esta corrente, que defende un capitalismo sen restricións e un control do Estado mínimo, converteuse na base de moitos dos discursos que dominan a política contemporánea. A obra de Torres é un exercicio de subversión visual que utiliza as reproducións das pinturas de Frederic Remington, reinterpretadas a través da man de copistas chineses, para cuestionar o mito fundacional dos Estados Unidos. O artista desvela como o anarcocapitalismo, do mesmo xeito que o colonialismo, se basea nunha visión do mundo onde as liberdades individuais se defenden á custa da desposesión e da explotación das persoas máis vulnerables. No centro da instalación, un revólver Colt, símbolo da conquista violenta do Oeste, aparece como o obxecto chave que, ao lado dunha copia de The Road to Serfdom de Friedrich Hayek, se erixe como o tótem dun pensamento económico que nega calquera forma de intervención estatal. Torres revela as contradicións inherentes a esta ideoloxía e mostra como, baixo a súa aparencia de liberdade, se oculta un proxecto de dominación. Esta obra tamén cuestiona a idea de que un capitalismo sen límites poida solucionar os problemas sociais, pois eliminar o Estado de benestar arrastraranos cara a novas formas de dependencia e control.