Bienal de Pontevedra

Wardha Shabbir (1987, Lahore, Paquistán) representa unha das voces máis singulares e comprometidas da arte contemporánea paquistaní. Desde a súa infancia en Lahore, a súa ollada estivo moldeada polo mundo que a rodea, en especial polo xardín que a súa familia cultivaba con esmero, un espazo de coidado, crecemento e contemplación. Tamén deixou pegada na artista a maneira na que a súa nai debuxaba pequenos motivos con liñas finas. Formada na tradición da pintura en miniatura, Shabbir sitúase nunha xeración de artistas paquistanís que, partindo da miniatura como disciplina matriz, a expanden ata convertela nunha ferramenta de pensamento crítico sen perder o rigor técnico nin a reverencia pola disciplina. Na súa práctica, a miniatura deixa de ser un artefacto estetizado para o consumo museográfico e transfórmase nun terreo de resistencia. Non é un medio, senón un espazo de negociación crítica entre o local e o global, o tradicional e o contemporáneo, o íntimo e o político.