A Bienal de Pontevedra e a Facultade de Deseño da Universidade de Vigo presentan a colección B32, que estará dispoñible a partir do vindeiro 10 de xullo na tenda do Museo de Pontevedra
A colección, que se compón de bolsas de algodón, sombreiros, cadernos, lapis e termos, foi deseñada no marco dun convenio de colaboración entre a Deputación de Pontevedra, a través do Museo de Pontevedra, e a Facultade de Deseño da Universidade de Vigo
10/07/2025
A Bienal de Pontevedra e a Facultade de Deseño da Universidade de Vigo presentaron hoxe B32, a colección de material promocional oficial da Bienal de Pontevedra, que xa está á venda na tenda do Museo de Pontevedra, no Edificio Castelao.
A colección, que toma o seu título da 32.ª edición da Bienal de Pontevedra, foi deseñada por un equipo multidisciplinar de profesorado e estudantado do Grao en Deseño e do Mestrado en Deseño e Dirección Creativa en Moda da Universidade de Vigo.
A partir da imaxe gráfica da Bienal de Pontevedra, o alumnado da Facultade de Deseño desenvolveu propostas de cor, rapport e aplicacións gráficas para implementar en diferentes produtos: bolsas de algodón, sombreiro reversible, cadernos de peto, lapis de carpinteiro e termos de gran capacidade, todos deseñados para ser aptos para todo tipo de público.
As fotografías da campaña realizáronse en diferentes estancias do convento de Santa Clara.
Desde este xoves 10 de xullo, a colección está á venda na tenda do Museo de Pontevedra, no Edificio Castelao.