Arrancan as visitas guiadas á Bienal de Pontevedra, que terán lugar os xoves, sábados e domingos, e que percorrerán diferentes itinerarios da mostra
A Bienal de Pontevedra abre ao público as súas visitas guiadas, que arrancan esta semana con percorridos temáticos cada xoves, sábado e domingo polas distintas sedes da exposición.
09/07/2025
Co obxectivo de achegarlle ao público os contidos e os espazos desta edición, a bienal ofrece itinerarios alternativos en diferentes horarios e localizacións para facilitar o acceso a todas as súas sedes. As visitas, gratuítas pero con inscrición previa obrigatoria, comezan o xoves 10 de xullo e prolongaranse ata o 28 de setembro, con prazas limitadas e acompañamento especializado. Ademais, os grupos organizados poderán solicitar unha visita fóra deste horario ás obras expostas nos edificios Castelao e Sarmiento.
Visitas dos xoves e domingos
Todos os xoves, ás 18 h, desde o 10 de xullo ata o 25 de setembro, e todos os domingos, desde o 13 de xullo ata o 28 de setembro, realizarase unha visita comentada centrada nas exposicións dos edificios Castelao e Sarmiento, dous dos espazos clave desta edición da bienal.
Cada visita conta con 20 prazas dispoñibles e require inscrición previa a través do correo electrónico reservas.museo@depo.es
Visitas dos sábados
A partir do sábado 12 de xullo e ata o 27 de setembro, todos os sábados ofreceranse dous itinerarios distintos:
- 11 h. Zona 1: “Esperanza na escuridade”
Percorrido polos edificios Castelao e Sarmiento, a igrexa de Santa Clara, a Fundación Manuel Moldes e o Café Moderno.
Ten unha duración aproximada de 2 horas e 15 minutos, incluída unha pausa de 15 minutos. O punto de encontro é o Edificio Castelao do Museo de Pontevedra. - 19 h. Zona 2: “Futuros posibles”
Itinerario polas Ruínas de San Domingos, o Pazo provincial, a Facultade de Belas Artes, a Casa da Luz, a Fundación RAC, a ponte de Santiago e o Pazo da Cultura.
Esta visita ten unha duración de 2 horas e 20 minutos, tamén cun descanso intermedio. O punto de encontro é nas Ruínas de San Domingos.
Ambos os percorridos contan con 20 prazas e requiren inscrición previa, que debe realizarse en https://espiralxc.es/visitas-guiadas/
Os percorridos organízanse alternando o horario das zonas cada fin de semana. Comezarán o sábado 12 de xullo na zona 1, ás 11 h, e na zona 2, ás 19 h, e o sábado seguinte cambiarase a orde. Deste xeito, permitirase facer as visitas en ambas as dúas zonas no horario que máis se axuste ás persoas participantes.