Bienal de Pontevedra

O traballo de Fritzia Irizar (1977, Culiacán, México) cuestiona as estruturas sociais que sosteñen as xerarquías e os valores que nos rodean. Nas súas obras, explora como os obxectos cotiáns adquiren novos significados ao ser incorporados ao ámbito da arte, ao pasar dun contexto común a un artístico. Irizar xoga coa idea de que, ao ser transformados, os obxectos non só cambian fisicamente, senón que tamén modifican o seu valor cultural, emocional e económico. Desta maneira, a artista convida a reflexionar sobre como a historia, a ciencia e outras narrativas, presentadas como verdades absolutas, en realidade son ficcións construídas por unhas poucas persoas.