Bienal de Pontevedra

O traballo de Beatriz Ruibal (1969, Pontevedra) mantén unha atención constante ao que queda fóra do foco, ao que desaparece ou, simplemente, non se mostra. A través da fotografía, do vídeo ou da instalación, a súa obra xera espazos onde o arquivo, a memoria cultural, a ecoloxía política e a fraxilidade do presente conviven nunha tensión sostida. Ruibal traballa con materiais e imaxinarios que foron desprazados ou silenciados polos discursos dominantes, e opera desde unha temporalidade non lineal, onde o pasado se actualiza no presente como forma de resistencia. Nas súas pezas o fragmentario, o residual, convértese en ferramentas para pensar o lugar do corpo, a desaparición, a violencia estrutural e as formas de vida que aínda subsisten nas marxes.