Durante o desenvolvemento do proxecto Migrant Bodies (2014-2015), Alessandro Sciarroni concibiu a idea dunha nova práctica performativa profundamente xerminal. Partindo da observación dos fluxos migratorios en certas especies animais —aquelas que, ao cabo do seu ciclo vital, regresan ao seu lugar de orixe para desovar e morrer—, o artista comezou a traballar sobre o concepto de "turning". O termo inglés tradúcese e represéntase en escena nun sentido literal a través da acción do corpo virando sobre o seu propio eixe. Esta acción desprégase como unha viaxe emocional e psicofísica —unha danza de duración— que reflicte o significado máis amplo de "turning" como proceso de evolución e transformación. O proxecto "Turning" divídese en diferentes presentacións e eventos que o artista denomina "versions". Cada versión implica diferentes performers, así como a artistas visuais, músicos e deseñadores, que son invitados a interpretar unha mesma acción segundo a súa propia sensibilidade. En consonancia co concepto dramatúrxico suxerido polo título, os materiais e as partituras físicas están suxeitos a cambios, evolución e transformación en cada evento individual.

Alessandro Sciarroni é un artista italiano que desenvolve a súa práctica no ámbito das artes escénicas, con varios anos de experiencia en artes visuais e investigación teatral. O seu traballo parte dunha matriz conceptual próxima a Marcel Duchamp, utilizando un marco teatral, e presentouse en festivais, museos e espazos non convencionais en Europa, América e Asia. Nas súas creacións colabora con profesionais de distintas disciplinas e incorpora técnicas e experiencias procedentes da danza, así como do circo e do deporte. O seu traballo busca revelar as obsesións, os medos e as fraxilidades inherentes ao acto de interpretar a través da repetición de prácticas levadas ao límite da resistencia física das e dos intérpretes. Deste xeito, explora unha dimensión distinta do tempo e fomenta unha relación empática entre público e performers. No 2019 foi galardoado co León de Ouro á Traxectoria en Danza pola Bienal de Venecia. É artista asociado de Marche Teatro.