Obras
Los desastres de la guerra (Os desastres da guerra, 1810-1815)
No marco da Bienal de Pontevedra, o Museo de Pontevedra presenta unha das pezas máis significativas de Goya: un libro de gravados orixinais da súa serie Los desastres de la guerra (Os desastres da guerra). Realizados entre 1810 e 1815, estes 82 gravados son fundamentais na historia da arte polo seu enfoque directo e cru sobre o horror da guerra da Independencia española. Goya conságrase coma un dos primeiros reporteiros de guerra, ao documentar con dureza os efectos devastadores do conflito. O impacto de Los desastres de la guerra radica na súa capacidade para reflectir sen adornos a brutalidade, o fanatismo e a inxustiza da guerra. A serie non glorifica os individuos nin se limita a episodios anecdóticos, senón que presenta o sufrimento humano de maneira colectiva, e convida as e os espectadores a reflexionar sobre as consecuencias da violencia e do poder.
